|
|
Skógfræðingafélag Íslands er fagfélag sem hefur það að meginmarkmiði að vera: a) málsvari skógfræðinga, b) efla samheldni og stuðla að bættri faglegri, fjárhagslegri og félagslegri aðstöðu þeirra og c) upplýsa aðra um menntun, færni og þekkingu skógfræðinga og vekja með því áhuga á starfsvettvangi þeirra. Allir sem lokið hafa B.Sc. gráðu í viðurkenndu háskólanámi í skógfræði geta sótt um aðild að félaginu og er stjórn jafnframt heimilt að gefa undanþágu frá lágmarks menntunarkröfum til þeirra sem hafa umtalsverða starfsreynslu í faginu. Háskólanemar í skógfræði geta fengið aukaaðild að félaginu. Umsóknir skulu vera skriflegar og stílaðar til Námsmatsnefndar Skógfræðingafélags Íslands á póstfang félagsins (umsóknareyðublað er að finna undir "Um félagið").
Fréttir
3. febrúar 2011 Hópur vistfræðinga á villigötum - Frétt frá stjórn Skógfræðingafélags Íslands
Fylgismenn og höfundar frumvarps um breytingar á náttúruverndarlögum koma nú fram og saka „tiltekin félagasamtök“ og „talsmenn skógræktar“ um hörð og ofsafengin viðbrögð við áðurnefndu lagafrumvarpi. Af því tilefni vill Skógfræðingafélag Íslands benda á málefnalegar og vandaðar umsagnir fjölmargra aðila, þar á meðal skógræktarfélaga og Skógræktar ríkisins, sem nálgast má hér.
Ástæða er til að fagna opinni og hreinskiptinni umræðu um framkomin drög að breytingum á lögum um náttúruvernd. Talsmenn frumvarpsins úr röðum vistfræðinga sem snúist hafa því til varnar benda nú á kanínur, spánarsnigla og minka sem dæmi um „ágengar framandi lífverur“ og þá „gríðarlegu ógn“ sem af slíkum lífverum stafar. Einn þeirra spyr jafnframt hvort varúð geti verið öfgafull. Því er fljótsvarað. Umrætt frumvarp tekur á engan hátt á innflutningi ofangreindra lífvera. Í stað þess að framfylgt sé sértækum vörnum til að sporna við innflutningi á þekktum plágum, sjúkdómum og tegundum sem valdið geta tjóni, er varúðarreglunni beint gegn aðfluttum tegundum og framandleika almennt. Það er gott dæmi um að varúðarreglan sé komin út í öfgar og missi marks. Varúðarreglu umhverfisréttar verður nefnilega að beita af mikilli varúð.
Fyrir hönd stjórnar Skógfræðingafélags Íslands,
Dr. Aðalsteinn Sigurgeirsson, formaður, Gsm 898 7862
Arnór Snorrason, gjaldkeri
Brynjólfur Jónsson, ritari
27. janúar 2011 Umsögn stjórnar um drög að frumvarpi til laga um breytingar á Náttúruverndarlögum
Hér undir er umsögn stjórnar Skógfræðingafélagsins um frumvarp til breyttra Náttúruverndarlaga, en frumvarpið hefur vakið talsverða umræðu innan skógræktar-, garðyrkju- og landbúnaðargeirans.
|
|
|