Yfirlit búvélaprófana árið 1982
KUHN – heyþyrla
Skýrsla nr. 514
Gerð: Kuhn GF 452 M. Framleiðandi: Kuhn S.A., B.P. 60-67700 Saverna, Frakkland. Innflytjandi: S.Í.S. véladeild, Reykjavík.
YFIRLIT
Heyþyrlan Kuhn GF 452 M var reynd af Bútæknideild Rannsóknastofnunar landbúnaðarins sumarið 1981 og notuð alls um 70 klst.
Hæfni heyþyrlunnar til heysnúnings reyndist viðunandi góð og hún fylgir ójöfnum lands fremur vel. Heymúgum dreifir vélin á 5-6 m breiðan flöt. Vinnslubreidd vélarinnar er 4,5 m, og afköst við heysnúning reyndust að jafnaði 2,7-3,1 ha/klst, en mest 3,5 ha/klst. Heyþyrluna má stilla þannig, að hún kasti heyinu nokkuð til hliðar, t.d. frá skurðbökkum. Pendúlliður í beislisbúnaði vélarinnar auðveldar vinnu með henni í beygjum. Ekki kom fram óeðlilegt slit í vélinni á reynslutímanum.
FELLA – heyþyrla
Skýrsla nr. 515
Gerð: Fella TH 670. Framleiðandi: Fella Werke GmbH, 8501 Feucht bei Nürnberg, Þýskalandi. Innflytjandi: Glóbus h.f. Reykjavík.
YFIRLIT
Heyþyrlan Fella TH 670 var reynd af Bútæknideild Rannsóknastofnunar landbúnaðarins sumarið 1981 og notuð alls um 80 klst.
Hæfni heyþyrlunnar til heysnúnings reyndust með ágætum og hún fylgir ójöfnum landsins fremur vel. Heymúgum dreifir vélin á 5-6 m breiðan flöt. Vinnslubreidd vélarinnar er 6,6 m, og afköst hennar við heysnúning reyndust að jafnaði 4,0-4,5 ha/klst, en mest um 5,5 ha/klst. Heyþyrluna má stilla þannig, að hún kasti heyinu nokkuð til hliðar, t.d. frá skurðbökkum. Vélin er fremur óstöðug í rásinni, þegar henni er ekið í flutningsstöðu á vegum. Á reynslutímanum urðu ekki teljandi bilanir á vélini, en tindabrot var verulegt.
MALETTI – jarðtætari
Skýrsla nr. 516
Gerð: Maletti PCV3. Framleiðandi: Maletti, Macchine Agricole, 41100 Modena, Ítalíu. Innflytjandi: Orkutækni h.f. Reykjavík.
YFIRLIT
Jarðtætarinn Maletti, PCV3 var reyndur af Bútæknideild Rannsóknastofnunar landbúnaðarins 1981 og notaður alls um 80 klst.
Vinnslubreidd tætarans er 180 cm og vinnugæði uppfylla þær kröfur, sem gerðar eru til jarðtætara varðandi vinnslu á algengum jarðvegstegundum hérlendis. Í fyrstu umferð var mesta vinnsludýpt á grónu landi 8-12 cm en í annari umferð 12-16 cm. Á myldnum ógrónum jarðvegi reyndist vinnsludýptin allt að 24 cm. Ökuhraði við tætingu er 2-4 km/klst og afköst oft á bilinu 0,3-0,6 ha/klst. Yfirleitt var notaður um 70 hestafla traktor við tætinguna, en á léttum jarðvegi veldur 40 hestafla traktor tætaranum. Á reynslutímanum brotnuðu alls 9 hnífar, en engar meiri háttar bilanir komu fram.
SOVEMA – jarðtætari
Skýrsla nr. 517
Gerð: Sovema, model SE 160S. Framleiðandi: Sovema, 41100 Modena Ítalíu. Innflytjandi: Glóbus h.f. Reykjavík.
YFIRLIT
Jarðtætarinn Sovema SE 160S var reyndur af Bútæknideild Rannsóknastofnunar landbúnaðarins 1981 og notaður alls um 50 klst.
Vinnslubreidd tætarans er 150 cm og vinnugæði uppfylla þær kröfur sem gerðar eru til jarðtætara varðandi vinnslu á algengum jarðvegstegundum hérlendis. Í fyrstu umferð var mesta vinnsludýpt á grónu landi 8-14 cm en í annarri umferð 16-17 cm. Í myldnum ógrónum jarðvegi var vinnsludýptin allt að 25 cm. Ökuhraði við tætingu var 2-4 km/klst og afköst oft á bilinu 0,2-0,5 ha/klst. Á léttum jarðvegi er 26-30 kW (35-42 hö) traktor nægilega stór, en við erfiðar aðstæður þarf 37-44 kW vél (50-60 hö). Minnsti hraði á hnífaöxli er 180 sn/mín, og er það í mörgum tilvikum óæskilega mikið. Á reynslutímanum brotnuðu alls 14 hnífar, en engar meiri háttar bilanir komu fram.
IH - heybindivél
Skýrsla nr. 518
Gerð: IH 435 D. Framleiðandi: International Harvester Co, Bretlandi. Innflytjandi: S.Í.S., véladeild, Reykjavík.
YFIRLIT
Heybindivélin 435 D var prófuð af Bútæknideild Rannsóknastofnunar landbúnaðarins sumarið 1981. Alls voru bundnir tæplega 30.000 baggar með vélinni. Bindivélin tók heyið vel upp úr múgum, og skildi eftir litla dreif. Hún batt heyið í vel mótaða bagga, 0,46 m breiða og 0,36 m þykka. Lengd þeirra er stillanleg á bilinu 0,4-1,1 m. Þéttleiki þeirra er stillanlegur innan víðra marka. Afköst við bindingu voru að meðaltali 7-8 t/klst, en við bestu aðstæður rúmlega 12 t/klst. Bindivélin þ.m.t. hnýtibúnaður vann mjög örugglega á reynslutímanum, og bilanir urðu ekki. Ekki er unnt að lyfta sópvindu úr ekilsæti.
NJF – rakastigsmælir
Skýrsla nr. 519
Gerð: NJF 1210. Framleiðandi: N.J. Froment & Co, Ltd., Stamford PE9 3NP England. Inflytjandi: Vélaborg h.f. Reykjavík.
YFIRLIT
NJF-rakastigsmælir kom til prófunar vorið 1981. Mælirinn er ætlaður til að ákvarða rakastig í heyi og korni. Hann var fyrst og fremst reyndur við ákvörðun á rakastigi í heyi á mismunandi þurrkstigi. Með NJF-mælinum má ákvarða rakastig í heyi á bilinu 25-75% af viðunandi nákvæmni. Mikilvægt er að vanda töku heysýna og endurtaka rakastigsákvörðun fjórum til fimm sinnum, eigi niðurstöður að vera áreiðanlegar. Töflur, sem fylgja tækinu og eiga að sýna rakastig heysins út frá mælisaflestri, reyndust ekki marktækar fyrir hey. Línurit var gert um þetta samband út frá þeim mælingum, sem gerðar voru við prófunina. Mælitækið er óháð raflögn og er handhægt í notkun. Hver rakastigsákvörðun tekur 2-3 mín.
KEMPER – heyhleðsluvagn
Skýrsla nr. 520
Gerð: Kemper KSL 280. Framleiðandi: Maschinenfabrik Kemper GmbH. 4424 Stadtlohn, V-Þýskalandi. Innflytjandi: S.Í.S. véladeild.
YFIRLIT
Heyhleðsluvagninn Kemper KSL 280 var prófaður af Bútækndeild Rannsóknastofnunar landbúnaðarins að Hvanneyri sumarið 1981. Á reynslutímanum var hann notaður alls um 150 klst.
Vagninn er ætlaður til hleðslu og flutnings á heyi og grænfóðri. Sópvindan vísar fram á við, og er hæð hennar stjórnað með vökvabúnaði dráttarvélar. Hleðslubúnaður vgnsins reyndist fljótvirkur og vann vel. Dreif eftir sópvindu var lítil. Hlassþungi var að jafnaði 1,5-2,5 tonn, háð þurrkleika heysins. Hleðslutími fyrir þurrhey var um 3,7 mín/t brúttó, en 2,7 mín/t nettó (rakast. 40%). Samsvarandi tölur um hleðslu votheys eru 1,6 mín/t br. og 1,3 mín/t net. (rakastig 80%). Hægt er að koma fyrir 25 hnífum í vagninum í tveimur röðum, 12 og 13 hnífar í hvorri. Hnífaraðirnar skarast, og er skurðarbil um 50 mm. Sé öllum hnífunum beitt, verðður söxun heysins veruleg, sem kemur til góða við votheysgerð. Losun vagnsins er mjög fljótleg og tekur 1,2-1,4 mín. Ætla verður 40 kW (54 hö) dráttarafl fyrir vagninn til að nýta afkastagetu hans til fulls. Dagleg umhirða er fljótleg og auðveld. Engar meiriháttar bilanir urðu á reynslutímanum.
SCALVENZI - sláttuvagn.
Skýrsla nr. 521
Gerð: F.lli Scalvenzi F 60/S. Framleiðandi: F.llo Scalvezi S.n.c. 25026 Pontevico, Brescia, Ítalía. Innflytjandi: Orkutækni h.f., Reykjavík.
YFIRLIT
Sláttuvagninn F.lli Scalcvenzi F 60/S var prófaður af Bútæknideild Rannsóknastofnunar landbúnaðarins að Hvanneyri sumarið 1981. Hann var notaður alls um 90 klst.
Vagninn hefur sambyggða sláttuþyrlu, 1,87 m að vinnslubreidd. Hann slær og hleður á sig í sömu andrá og er ætlaður til að hirða gras eða grænfóður beint til fóðrunar á fóðurgang eða til votheysgeymslu. Vagninn getur ekki hlaðið á sig heyi úr múgum eða flekk. Sláttutæki vagnsins reyndist slá jafnt en nokkru fjær rót en algengt er við notkun sláttuþyrla. Meðal subblengd í sláttufari mældist um 60 mm. Í hleðslustokk vagnsins má hafa allt að sjö hnífa. Bil á milli þeirra er frá 180 mm og verður söxun heysins því lítil og hefur tæpast gildi með tilliti til verkunar heys í votheysgeymslu.
Við venjulegar aðstæður var ökuhraði við slátt og hleðslu 6-7 km/klst. Þar sem uppskera var í góðu meðallagi eða 17-20 t/ha (40-47 hb/ha) reyndist hleðslu ásamt með stilliathöfnum og snúningum 7,5-10,0 mín á hlass eða 4-5 mín/t. Hlassþungi var að jafnaði á bilinu 1,7-2,0 tonn miðað við um 80% rakastig í heyi. Losun vagnsins gekk greiðlega og tók að jafnaði 4-5 mín á hlass ásamt með aðkeyrslu að votheysgeymslu.
Vagninn er erfiður í drætti, þar sem þungi hans hvílir að litlu sem engu leyti á dráttarvélinni. Áætla verður um 50 kW (70 hö) traktor til dráttar, en nokkru minni vél má komast af með, ef hún er búin fjórhjóladrifi. Á reynslutímanum brast festing fyrir vökvastrokk á hleðslubúnaði vagnsins og slit kom fram í kíl í drifbúnaði fyrir færiband vagnsins. Aðrar bilanir urðu ekki á reynslutímanum.
BUSATIS – sláttuvél
Skýrsla nr. 522
Gerð: Busatis BM 1102. Framleiðandi: Busatis Werke GmbH, Remscheid, Lennep, V-Þýskalandi. Innflytjandi: Dráttarvélar h.f. Reykjavík.
YFIRLIT
Tveggja ljáa sláttuvélin Busatis BM 1102 var reynd af Bútæknideild Rannsóknastofnunar landbúnaðarins sumarið 1981 og notuð tæplega 100 klst.
Sláttur vélarinnar er allgóður, en nauðsynlegt reyndist að brýna a.m.k. annan ljá vélarinnar á 3-5 klst fresti. Með refknúinni smergelskífu, er fylgdi vélinni, tekur um 10 mín að brýna hvorn ljá. Laust gras og kusk í slægjunni sest að jafnaði ekki í sláttubúnað vélarinnar en getur þó verið til trafala t.d. á beygjum. Sláttufjarlægð er stillanleg að nokkru með lengd yfirtengis, en einnig með lausum skóm á hvorum enda ljábakkans. Breidd sláttuskára er 1,5 m. Afköst eru að meðaltali tæplega 1,0 ha/klst við ökuhraða 7,0-9,0 km/klst. Vélin er gangþýð og létt og lipur í notkun. Aðgæta þarf öðru hvoru legu og afstöðu ljáa í sætum sínum. Aflþörf er um 15 kW (20 hö). Engar bilanir urðu á reynslutímanum utan það, að 10 ljáblöð brotnuðu. Í lok reynslutíma voru ljáir nær uppslitnir. |