Yfirlit búvélaprófana árið 1981
SAME – dráttarvél
Skýrsla nr. 505
Gerð: Same Taurus 60 DTV. Framleiðandi: Same trattori S.p.A. 24047 Treviglio, Ítalía. Innflytjandi: Orkutækni h.f., Reykjavík.
YFIRLIT
Dráttarvélin Same Taurus 60 DTV var reynd af Bútæknideild Rannsóknastofnunar landbúnaðarins síðari hluta árs 1980. Hún var notuð alls um 130 klst við ýmis bústörf. Vegna skorts á mælibúnaði eru tölur um orku, eldsneytiseyðslu, afköst og lyftigetu vökvakerfis o.fl. unnar úr opinberum skýrslum erlendum.
Dráttarvélin er búin fjórhjóladrifi og vegur um 2,8 tonn. Hámarksafl vélar, mælt í aflúttaki, er 54,5 hestöfl (40,1 kW), en við mælingu á sveifarás 58,0 hestöfl. Við staðlaðan snúninghraða aflúttaks, 540 sn/mín, gefur það 51,6 hestöfl (37,9 kW). Vélin reyndist gangörugg og sparneytin. Gírkassi hefur fjögur samhæfð hraðastig. Með drifstöng er valið um hátt og lágt drif eða afturábak. Ásamt með niðurfærslugír (minireduction) er um að velja 14 hraðastig áfram og 7 afturábak. Framhjóladrif dráttarvélarinnar eykur dráttarhæfni hennar að mun. Við mælingu, sem framkvæmd var á þurru, grónu túni var dráttarátak allt að 1600 kp með afturhjóladrifi einu saman, en 2300 kp með fjórhjóladrifi. Gerð og afstaða dráttar- og tengibúnaðar er innan þeirra marka, sem alþjóðlegur staðall kveður á um (ISO) Vökvakerfið hefur bæði stöðustillingu og sjálfvirka átaksstillingu. Lyftigeta á þrítengibeisli er allt að 1960 kp. Snúningsradíus dráttarvélarinnar mældist 4,2 m (án hemlanotkunar).
Ökumannshúsið er vandað og uppfyllir öryggiskröfur. Upphitunar- og loftræstibúnaður í húsi vann á fullnægjandi hátt. Hávaði í ekilshúsi er neðan þeirra marka, sem talin eru skaðleg. Afstaða sætis til stýrishjóls og fótstigs fyrir kúplingu veldur því, að vinnuaðstaða ökumanns er ekki eins og best verður á kosið. Annmarkar eru á staðsetningu og útfærslu handfangs fyrir aflúttakskúplingu. Dráttarvélin virðist vönduð að allri gerð og á reynslutímanum komu ekki fram neinar meiri háttar bilanir á dráttarvélinni, en hann var of skammur, til þess að unnt sé að dæma örugglega um endingu og slitþol vélarinnar.
FELLA – múgavél
Skýrsla nr. 506
Gerð: Fella TS 300 D. Framleiðandi: Fella-Werke GmbH, Feucht bei Nürnberg, V-Þýskalandi. Innflytjandi: Glóbus h.f.
YFIRLIT
Stjörnumúgavélin Fella TS 300 D var reynd af Bútæknideild Rannsóknastofnunar landbúnaðarins sumarið 1980 og notuð alls um 70 klst.
Múgavélin reyndist raka vel og skilja eftir litla dreif við algengar aðstæður. Magn dreifa í rakstrarfari mældist að jafnaði á bilinu 0,8-1,6 hb/ha. Vélin reyndist fylgja allvel ójöfnum á yfirborði landsins. Hún getur rakað frá skurðbökkum og girðingum, en traktor treður heyflekkinn. Mótvindur rýrir nokkuð rakstrargæðin. Ekki er unnt með góðu móti að raka heyi í mjög þykka múga með vélinni. Breidd rakstrarfars vélarinnar er allt að 2,5 m. Ökuhraði við múgun reyndist hæfilegur 8-10 km/klst, og voru afköst að jafnaði 1,7-2,0 ha/klst. Múgavélin er auðveld og lipur í tengingu og notkun. Múgspjaldið dró stöku sinnum hey saman í múganum. Nokkurt los var komið í festibúnað þrítengibeislis í lok reynslutímans, og dúkur í múgspjaldi lét á sjá, en að öðru leyti reyndist vélin traustbyggð.
CLAAS – múgavél
Skýrsla nr. 507
Gerð: Claas WSDS 280. Framleiðandi: Claas Maschinenfabrik GmbH, Harsewinkel, V-Þýskalandi. Innflytjandi: Dráttarvélar h.f. Reykjavík.
YFIRLIT
Stjörnumúgavélin Claas WSDS 280 var reynd af Bútæknideild Rannsóknastofnunar landbúnaðarins sumarið 1980 og var notuð alls um 70 klst.
Múgavélin reyndist raka viðunandi vel og skilja eftir fremur litla dreif við algengar aðstæður. Magn dreifa í rakstrarfari mældist að jafnaði 1,0-2,0 hb/ha. Vélin reyndist fylgja ójöfnum landsins fremur vel, en við greiðan akstur á illa sléttu landi bar nokkuð á því, að vélin sveiflaðist upp og niður á fjöðrunarbúnaði ökuhjólanna og skildi þá eftir meiri dreif en ella. Múgavélin getur rakað frá skurðbökkum og girðingum, en traktor treður heyflekkinn. Mótvindur rýrir nokkuð rakstrargæðin. Ekki er unnt með góðu móti að raka heyi í mjög þykka múga með vélinni. Breidd rakstrarfarsins er allt að 2,3 m. Ökuhraði við múgun reyndist hæfilegur 8-10 km/klst, og afköst voru að jafnaði 1,4-1,8 ha/klst. Múgavélin er auðveld og lipur í tengingu og notkun. Bilanir urðu ekki á reynslutímanum.
EGEBJERG – baggavagn
Skýrsla nr. 508
Gerð: Egebjerg, O. Giant. Framleiðandi: Egebjerg Maskinfabrik AS, 4500 Nyköbing, Danmörku. Innflytjandi: Röskva h.f. Ólafsvöllum, Árnessýslu.
YFIRLIT
Baggavagninn Egebjerg, gerð O var reyndur af Bútæknideild Rannsóknastofnunar landbúnaðarins sumarið 1980. Hann var notaður við hirðingu á um 6000 heyböggum alls.
Baggavagninn tengist aftan í heybindivél samtímis og binding fer fram og renna baggarnir sjálfkrafa upp í hann eftir skábraut, sem kemur í beinu framhaldi af baggastokk vélarinnar. Vegna mótstöðunnar í brautinni, verða baggarnir mun fastar bundnir en yrði við bindingu án vagnsins við sömu stillingu á bindivél. Baggarnir runnu yfirleitt greiðlega upp í vagninn, og hann tók 120-130 bagga af meðalstærð (75-85 cm langa), væri kastað til í honum einu sinni á hleðslutímanum. Á stórum sléttum túnspildum var vagninn yfirleitt ekki til trafala við heybindinguna, en á smáspildum olli hann oft töfum. Á kröppum beygjum er hætta á , að baggar snúist þvert og festist á baggabrautinni, einkum ef heyið er ekki vel þurrt. Í halla og á gljúpum jarðvegi verður vagninn þungur í drætti aftan í bindivélinni. Í milliferðum er hinsvegar ætlast til, að framþungi vagnsins hvíli á dráttarvélinni, og er hann þá vel meðfærilegur fyrir 40 hestafla vél. Vagninn er stöðugur í akstri, en hin mikla sporvídd hans (2,8 m) getur valdið erfiðleikum við mjóar brýr og þröng hlið. Við afhleðslu leggst baggahlassið í 8-10 m langa stæðu. Afköst við hirðingu eru háð vegalengd að hlöðu og öðrum aðstæðum. Við notkun á einum vagni við hirðingu heybagga að hlöðu mældust afköst 26-30 hb/klst, væri flutningsvegalengd um 1000 m og algeng vinnuaðstaða fyrir hendi. Séu notaðir tveir baggavagnar við hirðinguna, tefst heybindingin tiltölulega lítið, og mældust afköst þá 40-48 hb/klst miðað við sömu flutningsvegalengd.
FRAZER - mykjudreifari og vagn
Skýrsla nr. 509
Gerð: Vagn, 4,5 tonn. Mykjudreifari MM 450. Framleiðandi: Fraser LTD Rothienorman, Inverurie Aberdeenshire, Bretlandi. Innflytjandi: Glóbus h.f. Reykjavík.
YFIRLIT
Fraser flutningatækin (mykjudreifari og sturtuvagn) voru reynd af Bútæknideild Rannsóknstofnunar landbúnaðarins að Hvanneyri árið 1980. Heildarnotkunartími var um 150 klst.
Flutningavagni og mykjudreifara er komið fyrir, öðru í senn, á sameiginlegri hjólagrind. Töluvert verk er að færa annað tækjanna að henni og koma hinu fyrir.
Flutningavagninn ber um 4,5 tonn. Hliðarborð eru há og sterkleg, en læsing afturhlera fremur veikbyggð. Pallinum er hallað með vökvatjakk er tengist vökvakerfi dráttarvélar.
Mykjudreifarinn MM 450 er boltaður á hjólagrindina. Hann er sívalningslaga, og gengur öxull með áföstum keðjum eftir honum endilöngum. Öxullinn er knúinn frá aflúttaki dráttarvélar. Dreifarinn reyndist dreifa öllum tegundum búfjáráburðar viðunandi vel. Mesta vinnslubreidd eru um 7,0-8,0 m, en raunhæf vinnslubreidd um 3,0-3,5 m. Við dreifingu þarf því að skara ferðir svo að jöfn dreifing fáist. Dreifarinn er ekki viðkvæmur fyrir aðskotahlutum í áburðinum.
Fraser flutningatækin reyndust í heild sterkbyggð.
RNZ – áburðardreifari
Skýrsla nr. 510
Gerð: RNZ No 12/0-0,4. Framleiðandi: Agromet, Fabryka Maszyn Rolniczych, Brzeg, Pólland. Innflytjandi: Vélaborg h.f. Reykjavík.
YFIRLIT
Áburðardreifarinn RNZ no. 12 var reyndur af Bútæknideild Rannsóknastofnunar landbúnaðarins sumarið 1980 og notaður alls 47 klst.
Áburðardreifarinn er þyrildreifari og rúmar allt að 350 l. Við dreifingu grófkorna áburðar var vinnslubreiddin 12-14 m, væri skörun dreififerða hæfileg. Við dreifingu fínkorna áburðar er vinnslubreiddin mun minni. Eigi dreifing að vera viðunandi jöfn verður að skara dreififerðir af nákvæmni. Vindáhrifa gætir við dreifingu, einkum ef áburðurinn er fínkorna. Stilla má dreifimagn af viðhlítandi nákvæmni, en takmörkun á rennslismagni áburðar niður úr dreifaranum setur ökuhraða við dreifingu skorður, eigi að dreifa algengum skammti á tún í einni yfirferð. Kekkir í áburðinum geta valdið truflun á dreifingunni. Nokkurrar svignunar gætti í burðarramma áburðardreifarans, þegar ekið var með hann fullhlaðinn á illa sléttu landi. Ryðmyndun kom fram á dreifiskífu.
KUHN – sláttuþyrla
Skýrsla nr. 511
Gerð: Kuhn GMD 66. Framleiðandi: Kuhn S.A. 67700 Saverne Frakklandi. Innflytjandi: S.Í.S. véladeild, Reykjavík.
YFIRLIT
Sláttuþyrlan Kuhn GMD 66 var reynd af Bútæknideild Rannsóknstofnunar landbúnaðarins sumarið 1980 og notuð alls um 80 klst.
Sláttur hennar reyndist viðunandi góður, breidd sláttuskára er allt að 2,35 m. Stubblengd í sláttufari reyndist hæfileg (20-50 mm) í um 75% tilvika að meðaltali. Þrátt fyrir mikla vinnslubreidd vélarinnar, fylgir hún ójöfnum landsins allvel og er lipur í notkun. Afköst við slátt voru um 1,6-2,0 ha/klst, miðað við ökuhraðann 9-11 km/klst. Gera verður ráð fyrir minnst 33 kW (45 hö) dráttarvél til að knýja sláttuþyrluna, en til að ná hámarksafköstum þarf um 44 kW (60 hö). Endingartími sláttuhnífa var eðlilegur og festingar þeirra traustar. Engar bilanir komu fram á reynslutímanum.
CLAAS - sláttuþyrla með knosara
Skýrsla nr. 512
Gerð: Claas WM 20 C. Framleiðandi: Claas Maschinenfabrik GmbH, Harsewinkel, V-Þýskalandi. Innflytjandi: Dráttarvélar h.f. Reykjavík.
YFIRLIT
Sláttuþyrlan Claas WM 20 með sambyggðum heyknosara var reynd af Bútæknideild Rannsóknastofnunar landbúnaðarins sumarið 1980 og notuð alls um 75 klst.
Sláttuþyrlan reyndist slá jafnt og vel. Stubblengd í sláttufari mældist innan markanna 20-50 mm að meðaltali í 92% tilvika. Á illa sléttu landi voru nokkur brögð að því, að sláttuhnífar særðu grasrót. Vinnslubreidd vélarinnar er 1,65 m og mældust afköst að jafnaði 1,0-1,2 ha/klst miðað við algengar aðstæður og ökuhraðann 9-11 km/klst. Heyknosari er sambyggður sláttuþyrlunni, sem rífur og tætir heyið nokkuð í sundur um leið og slegið er. Notkun knosarans reyndist flýta þurrkun heysins nokkuð og stytti þurrkunartíma um 2-5 klst samanborið við óknosað hey, sem fékk sambærilega meðhöndlun að öðru leyti og miðað við þurrkun að 40% rakastigi. Ætla verður 35-45 kW (45-60 hö) traktor fyrir sláttuþyrluna. Ekki kom fram óeðlilegt slit í vélinni á reynslutímanum.
FAHR - sláttuþyrla með heyknosara
Skýrsla nr. 513
Gerð: Fahr KM 24 CR. Framleiðandi: Klöckner-Humboldt-Detz AG, Zweigniederlassung Fahr, Gottmadingen, V-Þýskalandi. Innflytjandi: Þór h.f., Reykjavík.
YFIRLIT
Sláttuþyrlan Fahr KM 24 CR með sambyggðum knosara var reynd af Bútæknideild Rannsóknastofnunar landbúnaðarins sumarið 1980 og notuð alls um 75 klst.
Sláttuþyrlan reyndist slá jafnt og vel. Stubblengd í sláttufari mældist innan markanna 20-50 mm að meðaltali í 88% tilvika. Á illa sléttu landi voru nokkur brögð að því að sláttuhnífar særðu grasrót. Vinnslubreidd vélarinnar er 1,85 m og mældust afköst við slátt að jafnaði 1,2-1,4 ha/klst miðað við algengar aðstæður og ökuhraðann 9-11 km/klst. Heyknosari er sambyggður sláttuvélinni, sem mer heyið nokkuð og tætir það um leið og slegið er. Notkun knosarans reyndist flýta þurrkun heysins nokkuð og stytti þurrkunartíma um 2-5 klst samanborið við óknosað hey, sem fékk sambærilega meðhöndlun að öðru leyti og miðað við þurrkun að 40% rakastigi. Ætla verður 35-45 kW (48-61 hö) traktor fyrir sláttuþyrluna. Ekki kom fram óeðlilegt slit í vélinni á reynslutímanum. |