Greiðandi sjóðfélagar voru 3.117 á árinu 2007. Heildariðgjaldatekjur námu um 469 mkr., sem er um 7,3% hækkun frá fyrra ári. Heildarlífeyrisgreiðslur úr sjóðnum á árinu námu um 793,3 mkr., til 3.788 lífeyrisþega, þar af greiddi ríkissjóður 41,9 mkr. Hrein eign til greiðslu lífeyris nam í árslok 21,6 milljörðum króna og hækkaði um 3,3% frá fyrra ári. Nafnávöxtun var 4,9% en hrein raunávöxtun neikvæð um 1,07%. Kvað hann árið 2008 fara vel af stað og raunávöxtun (breyting) á fyrsta ársfjórðungi væri um 2,7%. Eignir eru 20,7% hærri en áfallnar skuldbindingar og 9,2% hærri en heildarskuldbindingar.

Hann greindi frá því að aldurstenging réttinda hefði verið tekin upp 1. janúar 2007. Það þýðir að því yngri sem greiðandi sjóðfélagi er þeim mun hærri réttindi fær hann fyrir sitt iðgjald, sjóðnum gefst þá lengri tími til að ávaxta iðgjaldið.
Sjóðurinn sendir greiðandi sjóðfélögum yfirlit yfir iðgjöld tvisvar á ári og kynnir einnig starfsemi sína á heimasíðu sinni og í Handbók bænda.

Formaður lauk máli sínu með því að fara yfir brýnustu hagsmunamál sjóðsins. Í fyrsta lagi að greiðsla mótframlags úr ríkissjóði verði tryggð til frambúðar. Í öðru lagi væri ávöxtun sjóðsins mjög mikilvægur þáttur. Í þriðja lagi að jafnvægi haldist milli eigna og skuldbindinga, en taldi það þó fýsilegri kost að eignir aukist hraðar en skuldbindingar.

Hrein raunávöxtun á árinu 2007 var neikvæð um 1,07%, meðaltal hreinnar raunávöxtunar síðustu 5 ára 6,87% og síðustu 10 ára 4,16%. Sundurliðun ávöxtunar á eignasöfnum sjóðsins sýnir að ávöxtun var best hjá Landsbankanum.

Loks fór framkvæmdastjóri yfir lánareglur og lánveitingar. Nýjar lánareglur tóku gildi 25. febrúar 2008. Lánstími er frá 5 til 40 ára og hámark lána er 25 mkr. Vextir voru lækkaðir og eru nú 70 punktum hærri en meðalávöxtun á nýjasta flokki íbúðabréfa til 30 ára. Umsóknum um hærri upphæðir þarf að fylgja verðmat og greiðslumat. Samningur var gerður við Jón Hólm Stefánsson hjá Gljúfri fasteignasölu um gerð verðmata. Veðsetning má ekki fara yfir 60% af söluverði jarða, 50% af söluverði íbúðarhúsa og 35% af söluverði sérhæfðs atvinnuhúsnæðis. Veðsetning má þó ekki fara upp fyrir 80% af brunabótamati fasteigna. Ásókn í lánin hefur aukist með þessum breytingum.

Heildarlífeyrisskuldbindingar nema 25.057 mkr., áætlaður rekstrarkostnaður (í 50 ár) 893 mkr. Heildarskuldbindingar nema því samtals 25.950 mkr. Endurmetinn höfuðstóll sjóðsins miðað við 3,5% ávöxtun nemur 23.016 mkr. og verðmæti framtíðariðgjalda 5.329 mkr. Samtals nema endurmetnar eignir 28.345 mkr. Eignir umfram skuldbindingar nema 2.395 mkr. eða 9,2%.

Áfallnar lífeyrisskuldbindingar nema 18.521 mkr. og áætlaður rekstrarkostnaður 544 mkr. eða samtals 19.065 mkr. Eignir umfram áfallnar skuldbindingar nema 3.951 mkr., eða 20,7% af skuldbindingunum. Halli á framtíðarskuldbindingum hefur minnkað um 5% eftir að aldurstenging réttinda var tekin upp.

Framkvæmdastjóri lauk máli sínu með þökkum til starfsfólks sjóðsins, stjórnarmanna og allra samstarfsaðila sjóðsins fyrir mjög gott samstarf.

Marinó bar saman áherslur bankanna í fjárvörslu fyrir sjóðinn. Þar kemur fram að Landsbankinn hefur lagt meiri áherslu á skuldabréfaeignina en hinir vörsluaðilarnir og ávöxtun safns Landsbankans var töluvert betri en Kaupþings og Glitnis.

Hann fór yfir þróun markaða á síðasta ári. Hlutabréf hækkuðu mikið á fyrri hluta síðasta árs en lækkuðu svo aftur seinni hluta ársins. Stýrivextir Seðlabankans hækkuðu líka á árinu og ávöxtunarkrafa verðtryggðra skuldabréfa hækkaði.

Þá ræddi hann um mismunandi uppgjörsaðferðir á skuldabréfum. Hægt er að gera skuldabréf upp á markaðsvirði eða kaupkröfu. Séu skuldabréf gerð upp á markaðsvirði er miðað við viðskiptaverð í Kauphöll Íslands en ef þau eru gerð upp miðað við kaupkröfu er kaupverð þeirra framreiknað. Mikill munur getur verið á þessum tveimur aðferðum. Ávöxtunarkrafa skuldabréfa hækkaði á árinu 2007 sem gerði það að verkum að skuldabréf lækkuðu væru þau gerð upp á markaðsvirði en sýndu betri ávöxtun væru þau gerð upp á kaupkröfu. Hann tók dæmi um ríkisskuldabréf. Ávöxtun m.v. kaupkröfu er 10% en einungis 2-3% m.v. markaðskröfu.

Lífeyrissjóður bænda er frekar neðarlega á lista yfir raunávöxtun helstu lífeyrissjóða. Skuldabréf sjóðsins eru að mestu gerð upp á markaðsvirði þar sem meirihluti þeirra er í sjóðum. Væru skuldabréfin gerð upp á kaupkröfu færðist hann upp í 3. sæti yfir raunávöxtun helstu lífeyrissjóða.

Að lokum fór hann yfir þróun á fyrsta ársfjórðungi 2008. Hlutabréf hafa haldið áfram að lækka og nemur lækkunin um 20% frá áramótum. Gengi krónunnar hefur fallið mikið og vextir hækkað. Ávöxtunarkrafa skuldabréfa hefur lækkað á árinu.

Ekki tóku fleiri til máls og lagði fundarstjóri til að hann og fundarritari gengju frá fundargerð og var það samþykkt.


Fundi slitið kl. 16:09