|
|
Ársfundur 2007
Haldinn í Súlnasal á 2. hæð í Bændahöllinni við Hagatorg í Reykjavík
kl. 13:00 miðvikudaginn 7. mars 2007.
Fundarsetning.
Skúli Bjarnason formaður stjórnar Lífeyrissjóðs bænda setti fundinn. Hann lagði til að Örn Bergsson stjórnarmaður gegndi starfi fundarstjóra og að
Borghildur Jónsdóttir gegndi starfi fundarritara og var það samþykkt.
Örn tók við fundarstjórn. Hann lýsti fundarboði og telst það lögmætt.
Gengið til dagskrár.
| 1. | Skýrsla stjórnar.
Formaður stjórnar, Skúli Bjarnason, flutti skýrslu stjórnar.
Skúli tók við formennsku hjá sjóðnum 1. janúar 2007. Hann kvaðst taka við góðu búi og þakkaði fyrrverandi formanni það. Þá þakkaði hann stjórn, framkvæmdastjóra og starfsmönnum vel unnin störf.
Hann greindi frá því að þetta væri í fyrsta sinn sem ársfundur sjóðsins væri haldinn í tengslum við Búnaðarþing og kvaðst reikna með að framhald yrði á því ef vel tækist til.
Hann kynnti nýtt lagaákvæði um iðgjöld bænda, en með lögum nr. 167/2006, V. kafla, var mótframlag á móti iðgjöldum í Lífeyrissjóð bænda hækkað úr 6% í 8% frá
1. janúar 2007.
Greiðandi sjóðfélagar voru 3.186 á árinu 2006. Heildariðgjaldatekjur námu um 437 mkr., sem er um 4,8% hækkun frá fyrra ári. Heildarlífeyrisgreiðslur úr sjóðnum á árinu námu um 742,5 mkr., til 3.802 lífeyrisþega. Eins og sjá má af þessum tölum er ávöxtun lykilatriði hjá sjóðnum.
Hann kvaðst sérstaklega vilja vekja athygli á hreinni raunávöxtun sjóðsins 2006, en hún var 8,64%, og sagði að þeir sjóðir sem væru með hærri ávöxtun byggðu á meiri áhættu. Staða sjóðsins er bærileg en eignir umfram skuldbindingar voru 9,8% og nálgast það að hægt sé að auka lífeyrisgreiðslur og er það mjög jákvætt. Aldurstenging réttinda hjá sjóðnum tók gildi 1. janúar 2007. Réttindi í aldurstengdu kerfi eru háð aldri greiðandi sjóðfélaga þannig að því yngri sem greiðandi sjóðfélagi er þeim mun hærri réttindi fær hann.
Formaður lauk máli sínu með því að ræða brýnustu hagsmunamál sjóðsins. Í fyrsta lagi að greiðsla mótframlags úr ríkissjóði dugi áfram á móti iðgjöldum allra bænda og að hún verði tryggð til frambúðar. Hann kvaðst raunar undrast að greiðsla þess væri ekki nú þegar tryggð. Í öðru lagi væri ávöxtun sjóðsins mjög mikilvægur þáttur. Í þriðja lagi að eignir verði það mikið hærri en skuldbindingar að unnt verði að auka réttindi sjóðfélaga.
Í fjórða lagi væri það hagsmunamál allra lífeyrissjóða og lífeyrisþega að greiðslur úr sjóðunum skertu ekki greiðslur úr Tryggingastofnun ríkisins, alla vega ekki í eins ríkum mæli og nú er. Hann kvað það koma á óvart að skyggnast inn í þennan heim og sjá þessar gegndarlausu skerðingar sem ríkið beitir á þá sem eiga ellilífeyrisréttindi í lífeyrissjóðum. Þarna er um að ræða 10 – 12% af ævitekjum manna sem bundnar eru í lögum. Skerðingar Tryggingastofnunar merkja dulbúna skattlagningu. Skerðingar væru kannski í lagi ef viðkomandi hefði 200 þúsund krónur í ráðstöfunartekjur á mánuði, en hér væri verið að tala um mun lægri tölur. Það mætti einna helst líkja þessu við rán í myndrænni líkingu og væri gaman að láta á það reyna hvort um mannréttindabrot væri að ræða. Skerðing á örorkulífeyri væri af öðrum toga. Ef hann væri ekki skertur gæti farið svo að þeir sem njóta örorkulífeyris hefðu það betra en fyrir örorku. Það væri ekki tilgangurinn með þeirri lífeyristegund. Hann kvað ársfund vera réttan vettvang til að ræða þessi mál og þakkaði fyrir áheyrnina.
|
| 2. | Ársreikningur 2006.
Framkvæmdastjóri, Sigurbjörg Björnsdóttir, kynnti ársreikning.
Í yfirliti um hreina eign til greiðslu lífeyris kemur fram að iðgjaldatekjur námu 437 mkr., og lífeyrisgreiðslur 698 mkr. Fjárfestingartekjur námu 3.011 mkr., fjárfestingargjöld 46 mkr. og rekstrarkostnaður 34 mkr. Hækkun á hreinni eign nam 2.670 mkr. og hrein eign til greiðslu lífeyris í árslok nemur 20.905 mkr.
Hrein raunávöxtun á árinu 2006 nam 8,64%, meðaltal hreinnar raunávöxtunar síðustu 5 ára 5,98% og síðustu 10 ára 5,21%. Sundurliðun ávöxtunar á eignasöfnum sjóðsins sýnir að ávöxtun hjá fjárvörsluaðilum var mjög sambærileg, en þó áberandi hæst hjá Kaupþingi.
Loks fór framkvæmdastjóri yfir lánareglur og lánveitingar. Lánstími er allt að 40 ár og hámark lána er 6 mkr. Reglur þessar tóku gildi 11. október 2005. Lítil ásókn er nú í lánin.
|
| 3. | Tryggingafræðileg úttekt 2006.
Framkvæmdastjóri gerði grein fyrir tryggingafræðilegri úttekt.
Hún fór stuttlega yfir aldursdreifingu greiðandi sjóðfélaga en mjög fáir eru undir 40 ára aldri og ávinna sér hlutfallslega minnstu réttindin.
Heildarlífeyrisskuldbindingar nema 22.959 mkr., áætlaður rekstrarkostnaður (í 50 ár) 808 mkr. Heildarskuldbindingar nema því samtals 23.767 mkr. Endurmetinn höfuðstóll sjóðsins miðað við 3,5% ávöxtun nemur 21.872 mkr. og verðmæti framtíðariðgjalda 4.231 mkr. Samtals nema endurmetnar eignir 26.103 mkr. Eignir umfram skuldbindingar nema 2.336 mkr. eða 9,83%.
Áfallnar lífeyrisskuldbindingar nema 17.401 mkr., og áætlaður rekstrarkostnaður 517 mkr. Áfallnar skuldbindingar nema alls 17.918 mkr. Eignir umfram áfallnar skuldbindingar nema því 3.954 mkr., eða 22,06% af skuldbindingunum.
Framkvæmdastjóri lauk máli sínu með þökkum til starfsfólks sjóðsins, stjórnarmanna og allra samstarfsaðila sjóðsins fyrir mjög gott samstarf.
|
| 4. | Fjárfestingar 2006
Fulltrúi Landsbanka Íslands, Valgeir Geirsson, gerði grein fyrir fjárfestingastefnu, eignasamsetningu, fjárfestingum og þróun markaða. Vikmörkum fjárfestingastefnu var lítillega breytt fyrir árið 2007. Helstu breytingar varða heimildir til fjárfestinga í skuldabréfum, en þar hefur svigrúm verið aukið.
Varðandi samsetningu eignasafnsins má helst nefna að skuldabréfaeign er hlutfallslega heldur hærra hlutfall af þessum sjóði en gerist og gengur. Þetta má sjá með samanburði við lífeyrissjóðakerfið í heild. Mestur munur er á skuldabréfaeign með ríkisábyrgð. Framboð á slíkum bréfum fer nú minnkandi og fyrirsjáanlegt er að breytingar muni verða á íbúðalánakerfinu. Þá eru líka komin önnur bréf sem þykja meira spennandi.
Þá fór hann yfir þróun markaða á síðasta ári. Mikil verðbólguhrina kom í kjölfar veikingar krónunnar á fyrri helmingi ársins. Stýrivextir Seðlabankans hækkuðu hratt og ávöxtunarkrafa verðtryggðra skuldabréfa hækkaði á síðari helmingi ársins eftir að krónan tók að styrkjast á nýjan leik og óvissu um erlenda fjármögnun íslensku bankanna var eytt.
Útlitið er ágætt á þessu ári. Vextir gætu farið að lækka eitthvað, en það gæti orðið seint á árinu. Við það fer skuldabréfahlutinn að gefa betur af sér.
|
| 5. | Kynnt tillaga um breytingu á samþykktum.
Framkvæmdastjóri gerði grein fyrir tillögu að breytingum á 9. grein í samþykktum fyrir sjóðinn. Með lögum nr. 167/2006, V. kafla, var mótframlag á móti iðgjöldum í Lífeyrissjóð bænda hækkað úr 6% í 8% frá 1. janúar 2007. Þótt hér sé um breytingu á lögum um sjóðinn að ræða og hún hafi tekið gildi 1. janúar er nauðsynlegt að breyta mótframlaginu einnig í samþykktum fyrir sjóðinn. Þá er ennfremur orðalagsbreyting varðandi eindaga á iðgjaldagreiðslum. Tilgangurinn með breytingunum er að uppfylla lagaákvæði varðandi mótframlagið og að samræma ákvæði um eindaga iðgjalda.
|
| 6. | Önnur mál
Orðið laust
Rögnvaldur Ólafsson kvað ástæðu til að þakka að ársfundur væri á sama tíma og Búnaðarþing. Kvaðst hann sjaldan hafa heyrt talað eins tæpitungulaust og formaður gerði í ræðu sinni. Sagðist hann gleðjast yfir sjóðnum. Hann væri vel rekin og góð stofnun, góður lífeyrissjóður. Iðgjald væri lágt vegna lágra launa bænda. Hann tók sem dæmi iðnaðarmann sem greiðir sama hlutfall af launum sínum í lífeyrissjóð en 4% iðgjald hans er kannski svipuð upphæð og 12% iðgjald bónda, þar sem laun iðnaðarmanns væru mun hærri. Með mótframlagi er iðnaðarmaðurinn því að ávinna sér þrefalt hærri lífeyrisrétt en bóndinn. Sagði hann menn gleyma að bera saman það sem þeir greiddu inn í sjóðinn þegar þeir væru að bera saman hvað þeir fengju greitt úr honum. Þeir bændur sem væru óánægðir með sinn lífeyrisrétt ættu því að finna sér annan farveg til að auka lífeyri sinn.
Þórólfur Sveinsson kom með fyrirspurn um hve mikill hluti eigna sjóðsins væri bundinn vísitölu neysluverðs og af hverju væri mismunur á milli ávöxtunar hjá vörsluaðilum? Þá kvað hann því vera spáð í forsendum fjárfestingastefnu að eftir 2015 fari útstreymi að verða meira en innstreymi og spurði hvort sjóðurinn þyrfti þá að vera undir það búinn að losa féð? Þá innti hann eftir því hverju þetta myndi breyta fyrir sjóðinn.
Framkvæmdastjóri svaraði fyrirspurnum Þórólfs. Fjárfestingastefna sjóðsins er miðuð við það sem mun gerast 2015 þannig að til séu seljanleg verðbréf þegar þar að kemur. Mismunur í ávöxtun er vegna þess að það eru mismunandi áherslur hjá hverjum vörsluaðila fyrir sig. Meirihluti skuldabréfasafnsins er bundinn vísitölu neysluverðs.
Haraldur Benediktsson sagði það vera eðlilegt að menn fengju út úr sjóðnum miðað við hvað þeir greiddu inn í hann. Mjög mikilvægt væri að mótframlag yrði tryggt með einhverjum hætti. Kvaðst hann ekki fá annað séð en að ef mótframlag dygði ekki á þessu ári yrði að rukka þá sem greiddu í sjóðinn fyrir mismuninum. Hann sagði að það yrði fyrir alla muni að gæta þeirrar stöðu sem sjóðurinn væri kominn í. Hann lauk máli sínu með því að bjóða nýjan formann velkominn.
Egill Sigurðsson þakkaði fróðlega skýrslu og annan fróðleik sem fram hefði komið. Hann sagði sjóðinn hafa styrkst á undanförnum árum og væri það aðallega vegna utanaðkomandi áhrifa, en þar ætti hann við sölu Lánasjóðs landbúnaðarins. Hann kvaðst vilja koma vangaveltum sínum vegna mögulegrar sölu hótelsins á framfæri. Hann væri þeirrar skoðunar að ágóðinn af henni (ef einhvern tíma yrði selt) ætti að renna í Lífeyrissjóð bænda. Þá spurði hann formann og framkvæmdastjóra hvort hugsanlegt væri ef ágóði rynni inn í sjóðinn að aldurstengja féð þannig að þeir sem greiddu á sínum tíma fyrir hótelið fengju hærri réttindi. Jafnframt þakkaði hann ágæta ræðu formanns um skerðingar og sagði óþolandi að gengið væri svona hart fram við að skerða.
Jón Guðbjörnsson tók undir það sem áður hafði komið fram. Sagði hann að ráðdeild væri í rekstri og umsýslu sjóðsins og þakkaði mönnum það. Hann sagðist vera þeirrar skoðunar að því lengra sem liði frá því að lífeyrissjóðakerfið var tekið upp því meira myndi aðkoma ríkis minnka. Í því ljósi kvað hann ræðu Rögnvaldar athygliverðari.
Formaður svaraði spurningum Egils. Hann kvaðst í fljótu bragði ekki telja að lagaheimild væri fyrir slíkri aldurstengingu á inngreiðslu í sjóðinn. Þá sagði hann að einnig væru tæknilegir örðugleikar varðandi hver ætti að fá hvað og hvernig. Svarið á þessu stigi væri einfaldlega nei.
Ekki tóku fleiri til máls og lagði fundarstjóri til að hann og fundarritari gengju frá fundargerð og var það samþykkt.
Fundi slitið kl. 14:40
|
|
|
|