|
|
Ársfundur 2005
Haldinn í Skála á 2. hæð í Bændahöllinni við Hagatorg í Reykjavík kl. 16:00 þriðjudaginn 14. júní 2005.
Fundinn sátu stjórnarmennirnir: Guðríður Þorsteinsdóttir, Guðmundur Grétar Guðmundsson, Loftur Þorsteinsson, Ólafur Páll Gunnarsson og Örn Bergsson. Starfsmenn: Borghildur Jónsdóttir, Erla Stefánsdóttir, Sigrún Þóra Björnsdóttir og Sigurbjörg Björnsdóttir. Aðrir: Daníel Arason og Helga Indriðadóttir frá Íslandsbanka, Friðrik Nikulásson og Davíð Harðarson frá Landsbanka, Brynja Hjálmtýsdóttir frá KB-banka og Gísli Guðmundsson frá Deloitte hf.
Gestir: Sigurbjartur Pálsson stjórnarmaður hjá Bændasamtökum Íslands, Sigríður Bragadóttir stjórnarmaður hjá Bændasamtökum Íslands og varamaður í stjórn Lífeyrissjóðs bænda, Þorsteinn H. Gunnarsson fyrrverandi bóndi og Sigurgeir Þorgeirsson framkvæmdastjóri Bændasamtaka Íslands.
Fundarstjóri var Örn Bergsson og fundarritari Borghildur Jónsdóttir.
Gengið til dagskrár.
| 1. | Skýrsla stjórnar.
Formaður stjórnar, Guðríður Þorsteinsdóttir, flutti skýrslu stjórnar.
Auk venjulegrar árlegrar yfirferðar um hefðbundna starfsemi sjóðsins á liðnu ári greindi formaður frá því að stjórnin hefði hug á því að láta á það reyna hvort takist að ljúka ársuppgjöri vegna ársins 2005 fyrir Búnaðarþing 2006 þannig að næsti ársfundur yrði haldinn á sama tíma og þingið.
Hún gat þess að snemma á árinu 2004 hefði stjórn sjóðsins ákveðið að flytja réttinda- og lífeyrisbókhald sjóðsins yfir í lífeyrissjóðakerfið Jóakim. Komin væri alllöng reynsla á kerfið, en það væri í stöðugri þróun og nú notað af 17 lífeyrissjóðum. Réttindi hefðu verið flutt í september og lífeyrir um áramót. Á sama tíma hefði verið hafið samstarf við Greiðslustofu lífeyrissjóða sem annast greiðslur fyrir þessa lífeyrissjóði. Hún kvað stjórn sjóðsins vænta góðs af þessum breytingum til lengri tíma en ljóst væri að allnokkur kostnaður muni falla á árið 2005 vegna breytinganna.
Hún sagði að gerður hefði verið nýr samningur við KB banka um fjárvörslu og samkvæmt gildandi samningum sæju nú Íslandsbanki, Landsbanki og KB banki um fjárvörslu fyrir sjóðinn.
Hún greindi frá helstu stærðum varðandi afkomu sjóðsins. Sjóðinn vanti 5,7% til að eiga fyrir áföllnum skuldbindingum og 9,7% til að eignir dugi fyrir heildarskuldbindingum. Meginástæða lakari stöðu nú væri að teknar hefðu verið í notkun nýjar töflur um lífslíkur Íslendinga. Á þessu ári yrði líklega óhjákvæmilegt að taka einnig í notkun nýjar töflur um örorkutíðni og gæti það leitt til enn lakari stöðu. Í lögum væru ákvæði um að skylt sé að skerða lífeyri og lífeyrisrétt sjóðfélaganna ef meira en 10% vanti á að sjóðurinn eigi fyrir heildarskuldbindingum. Ennfremur væru í lögunum ákvæði um að grípa skuli til aðgerða ef halli er meiri en 5% fimm ár í röð. Árið 2004 væri þriðja árið í röð sem halli sjóðsins væri meiri en 5% og ekki virtist útlit fyrir að staða hans geti batnað nægilega næstu tvö ár án þess að gripið verði til aðgerða.
Þá gat hún þess að nú í vor hefðu verið samþykkt á Alþingi lög um breytingu á lögum sjóðsins. Samkvæmt ákvæðum laganna skuli iðgjöld sjóðfélaga nema að lágmarki 4% af iðgjaldsstofni og mótframlag að lágmarki nema 6% af sama stofni. Þessar breytingar væru í samræmi við þau ákvæði sem gilda um aðra lífeyrissjóði og gefi möguleika á hækkun iðgjalds og mótframlags. Hún kvað hækkun mótframlags í 7% án réttindaaukningar bæta stöðu sjóðsins um 1,9% samkvæmt útreikningum tryggingafræðings og væri brýnt að ráðast í þá breytingu.
Loks sagði hún að með lagabreytingunni nú í vor hefði einnig verið heimilað að taka upp aldurstengingu réttinda hjá sjóðnum. Flestir almennu lífeyrissjóðirnir væru að taka upp aldurstengingu réttinda um þessar mundir. Aldurstengingin væri orðin óhjákvæmileg hjá Lífeyrissjóði bænda og yrði fljótlega hafist handa við undirbúning hennar. Í grófum dráttum virki hún þannig að ungir sjóðfélagar fái meiri réttindi fyrir iðgjöld sín en eldri sjóðfélagar og byggist það á því að mun lengri tími gefist til að ávaxta iðgjaldið eftir því sem sjóðfélaginn væri yngri. Hún kvað aldurstengingu réttinda nokkuð umfangsmikla aðgerð. Til þess að unnt væri að fara í hana þyrfti fyrst að ná jafnvægi á áfallnar skuldbindingar og til þess þyrfti utanaðkomandi fjármagn ef komast ætti hjá skerðingu réttinda. Hún kvað því ekki að neita að stjórnin bindi nokkrar vonir við ákvæði í nýsamþykktum lögum um sölu á Lánasjóði landbúnaðarins þess efnis að andvirði hans renni í Lífeyrissjóð bænda. Gangi það eftir gæti það bæði orðið til þess að jafnvægi náist í stöðu sjóðsins og unnt verði að bæta áunnin lífeyrisréttindi. Ákvörðun um hvernig staðið verði að aldurstengingu væri því háð því hver niðurstaða verði í því máli. Líklega verði nauðsynlegt að halda auka ársfund nú í haust, eigi breyting að ganga í gegn um áramót.
Formaður lauk máli sínu með því að ræða brýnustu hagsmunamál sjóðsins en þau eru áfram þau sömu og verið hafa: Að greiðsla mótframlags úr ríkissjóði dugi áfram á móti iðgjöldum allra bænda og hún verði tryggð til frambúðar, að mótframlag hækki, að ávöxtun verði sem best tryggð og að jafnvægi náist milli eigna og skuldbindinga sem fyrst .
|
| 2. | Ársreikningur 2004.
Framkvæmdastjóri, Sigurbjörg Björnsdóttir, kynnti ársreikning.
Í yfirliti um hreina eign til greiðslu lífeyris kemur fram að iðgjaldatekjur námu 388 mkr. og lífeyrisgreiðslur 615 mkr. Fjárfestingargjöld námu 21 mkr. og rekstrarkostnaður 27 mkr. Hækkun á hreinni eign nam 1.197 mkr. og hrein eign til greiðslu lífeyris í árslok nemur 13.894 mkr.
Hrein raunávöxtun á árinu 2004 nam 7,13%, meðaltal hreinnar raunávöxtunar síðustu 5 ára 1,33% og síðustu 10 ára 4,76%. Sundurliðun ávöxtunar á eignasöfnum sjóðsins sýnir að ávöxtun hjá fjárvörsluaðilum var mjög sambærileg.
Loks fór framkvæmdastjóri yfir lánareglur og lánveitingar. Helsta breyting er að vextir miðast nú við ávöxtun íbúðabréfa en ekki húsbréfa.
|
| 3. | Tryggingafræðileg úttekt 2004.
Framkvæmdastjóri gerði grein fyrir tryggingafræðilegri úttekt.
Hún fór stuttlega yfir aldursdreifingu greiðandi sjóðfélaga en mjög fáir eru undir 40 ára aldri og ávinna sér hlutfallslega minnstu réttindin.
Heildarlífeyrisskuldbindingar nema 19.446 mkr., áætlaður rekstrar-kostnaður (í 50 ár) 636 mkr. Heildarskuldbindingar nema því samtals 20.082 mkr. Endurmetinn höfuðstóll sjóðsins miðað við 3,5% ávöxtun nemur 14.258 mkr. og verðmæti framtíðariðgjalda 3.867 mkr. Samtals nema endurmetnar eignir 18.125 mkr. Halli nemur 1.957 mkr. eða 9,74%.
Áfallnar lífeyrisskuldbindingar nema 14.722 mkr., og áætlaður rekstrarkostnaður 402 mkr. Áfallnar skuldbindingar nema alls 15.124 mkr. Halli nemur því 866 mkr., eða 5,72% af skuldbindingunum.
Framkvæmdastjóri lauk máli sínu með þökkum til starfsfólks sjóðsins, stjórnarmanna og allra samstarfsaðila sjóðsins fyrir mjög gott samstarf.
|
| 4. | Fjárfestingar 2004.
Fulltrúar KB banka, Brynja Hjálmtýsdóttir, og Landsbanka, Friðrik Nikulásson, gerðu grein fyrir fjárfestingastefnu, fjárfestingum og þróun markaða:
|
 | Brynja gerði grein fyrir fjárfestingarstefnu sjóðsins, en henni var lítillega breytt fyrir árið 2005. Í breytingunni fólst að lágmark skuldabréfa var lækkað í 60% (úr 65%) og hámark hlutabréfa hækkað í 40% (úr 35%). Þá var vikmörkum skuldabréfa með ríkisábyrgð breytt í 25-50% (úr 35-55%).
|
| Friðrik fór yfir helstu áhrifaþætti á síðasta ári svo sem stöðuga hækkun hlutabréfa innanlands, lækkun á ávöxtunarkröfu verðtryggðra skuldabréfa, hækkun stýrivaxta Seðlabanka Íslands og styrkingu á gengi krónunnar undir lok ársins. Þá fór hann yfir þróun markaða það sem af er þessu ári og nefndi þar helst hækkun innlendra hlutabréfa og styrkingu krónunnar.
|
| 5. | Önnur mál.
Sigurgeir Þorgeirsson kvaddi sér hljóðs og þakkaði stjórn og starfsfólki sjóðsins gott samstarf. Hann kvað bændur reikna sér lág laun og því væri viðmiðun til greiðslu iðgjalda of lág. Hann kvað brýnt að bregðast við til að styrkja sjóðinn. Hann sagði sölu Lánasjóðs landbúnaðarins vissulega vekja vonir fyrir sjóðinn, en ekkert væri þó sjálfgefið og nauðsynlegt væri að efla réttindi bænda á komandi árum.
Ekki tóku fleiri til máls og lagði fundarstjóri til að hann og fundarritari gengju frá fundargerð og var það samþykkt.
Fundi slitið kl. 17:10 |
|
|
|